சிந்தனைகள் - கருத்துகள்

மிக மோசமான நுட்பத் தயாரிப்புகள்--பகுதி 2

2006-10-29T12:39:00.000+03:00

பகுதி -1

6. Disney The Lion King CD-ROM (1994)

ஒரு கிறிஸ்துமஸ் விடுமுறைக்காக விற்கப்பட்ட இந்த கணினி விளையாட்டுக் குறுந்தகடு, அப்போதிருந்த விண்டோஸ் 95 இயங்குதளத்துடன் இயங்கும் என எதிர்பார்க்கப் பட்டு விற்பனைக்கு வந்தது. இதனை இயக்க நினைத்து கணினியில் இட்டவர்கள் தான் அநேகமாக முதலில் நீலச்சாவுத் திரை (Blue Screen of Death)யைக் கண்டவர்களாக இருப்பர். இந்த விளையாட்டிற்கு வின்-G எனப்படும் கிராஃபிக்ஸ் எந்திரம் தேவைப்பட்டது. ஆனால் அப்போதிருந்த கிராஃபிக்ஸ் கார்டுகளில் பல நுணுக்கமான IRQ மாறுதல் செய்தாலொழிய உங்களுக்கு இந்த விளையாட்டு பயன்படாது.

இருப்பினும், இந்த மாபெரும் தோல்விக்குப் பிறகு தான் மைக்ரோசாஃப்ட் தற்போது பிரபலமாக உள்ள டைரக்ட்-X கிராஃபிக்ஸ் எந்திரத்தை வடிவமைத்தது.

7. Microsoft Bob (1995)

மைக்ரோசாஃப்டின் அலுவலகச் செயலிகளைப் பயன்படுத்துவோர் அதனது எரிச்சலூட்டும் உதவிக் கார்ட்டூன்களைப் (ஆஃபிஸ் கிளிப் நினைவுக்கு வருகிறதா?) பார்க்காமல் இருக்க முடியாது. அவற்றின் முன்னோடி தான் இந்த Bob. இந்த Bob உதவியை விட உபத்திரவம் தான் நிறையச் செய்தார் (அவர் என்றே மரியாதையாக அழைப்போமே!) என்றால் அது மிகையில்லை. இவர் உதவிக்குப் பதில் சொன்னதைவிட நம்மிடம் எரிச்சலூட்டக் கேட்ட கேள்விகள் தான் அதிகம். எல்லாவற்றுக்கும் மேலே இவரது முகம் கிட்டத்தட்ட பில் கேட்ஸின் முகம் போல இருந்தது ஒரு வேளை தற்செயலாகவே இருக்குமோ?

8. Microsoft Internet Explorer 6 (2001)

ஹா ஹா.. மோசமான தயாரிப்புகள் என்று பெயர் வைத்து விட்டு அதில் நமது IE இல்லாமலா? இதில் பெரும் விசேஷம் என்ன்வென்றால், IE 6, IE 5 -ஐ விட அதிகமான ஓட்டைகளுடன் வந்தது தான். ஓட்டை எப்படிப் பட்டதென்றால் உங்கள் கணினியை ஒரு hacker தன் கட்டுப்பாட்டுக்குள் முழுவதுமாகக் கொண்டு வர இயலும். இதனைக் கண்டுபிடித்தவுடன் நமது மைக்ரோசாஃப்ட் அண்ணாச்சிகள் Cumulative Security Patch ஐ வெளியிட்டார்கள். அதில் எந்த வெட்கமும் இல்லாமல் "This update eliminates all previously addressed security vulnerabilities, as well as any newly discovered vulnerabilities affecting Internet Explorer, which can allow a potentially malicious code to be executed. Download now to protect your computer from these vulnerabilities." என்றே சொன்னார்கள். இன்னும் சொல்லிக் கொண்டு இருக்கிறார்கள். தற்போது பீட்டா நிலையில் இருக்கும் IE 7 முதற்கட்டப் பரிசோதிப்பில் நன்றாக உள்ளதாகத் தெரிகிறது. மேலும் நெருப்புநரி பற்ற வைத்த நெருப்பில் இவர்கள் பாடம் கற்றுக் கொண்டு நல்ல பல அம்சங்களை இதில் புகுத்தி உள்ளார்கள்.

9. Pressplay and Musicnet (2002)

இசையை எவ்வளவு எளிதாகக் கணினி மயமாக்க முடிந்ததோ அவ்வளவு எளிதாகவும் விரைவாகவும் அவற்றைப் பரப்ப முடிந்தது. இதனால் இசையை வெளியிடும் நிறுவனங்கள் தங்கள் பிழைப்பில் மண் விழும் என அஞ்சி இதற்கு எதிரான நிலையையே எடுத்து வந்தன. எனினும், ஆடிக்காற்றில் பெரும் அம்மியே நகரும் போது, இசைக்கோப்புகள் எம்மாத்திரம்? நாப்ஸ்டர் எனப்படும் Peer-to-peer கோப்புப் பரிமாற்ற முறைக்கு ஒருவழியாக சதி செய்து முடிவு கட்டிய கையோடு இறுமாந்திருந்த வேளையில் வந்தது வினை டாரண்ட் (Torrent) என்ற வடிவில். எனினும் இதைக் கட்டுப்படுத்தவே இயலாது என்ற நிலையைத் தெளிவாகத் தெரிந்த பின் குறிப்பிட்ட இரு நிறுவனங்களும் (Pressplay and Musicnet) காசு கொடுத்து தரவிறக்கம் செய்துகொள் என்கிற சமதானத்துக்கு வர, அதுவும் பெரும் வினையானது--- எப்படி?

மாதம் 15 டாலருக்கு 500 ஒலித்தரம் குறைவான பாடல்களைத் தரவிறக்கம் செய்து கொள்ளலாம். அவை 30 நாள்களுக்குப் பின் expire ஆகிவிடும். இரண்டு முறைக்கு மேல் ஒரே கலைஞரின் பாடலைத் தரவிறக்கம் செய்ய இயலாது. (தகவல்களில் சிறு பிழை இருக்கலாம்) இதற்கு நாங்கள் இலவசமாக உயர்தர ஒலிக்கோப்புகளை டாரண்ட் வழியாகத் தரவிறக்கம் செய்து கொள்வோமே என்று வாசகர்கள் ஓட, இந்த இரு நிறுவனங்கள் மேல் நமக்குக் கழிவிரக்கம் தான் விஞ்சுகிறது.

10. dBASE IV (1988)

1980களில் எனக்கு டி-பேஸ் தெரியும் என்று எவராவது கூறினால் அவர் பெரிய டெக்னோக்ராட். மேசைக்கணினிகளில் தரவுதளத்தைப் புகுத்தியதில் ஆஷ்டன்-டேட் நிறுவனத்தின் வியாபாரப் புத்திக் கூர்மையை எவரும் மறுக்க இயலாது. அப்போது சிறு கணினி தரவுத்தள சந்தையில் 70 சதவீத இடம் பெற்றிருந்த டி-பேஸ் III க்கு யார் வினை வைத்தார்கள்? சொந்த செலவில் அவர்களே வைத்துக் கொண்ட சூனியம் தான் டி-பேஸ் IV. பெரும் பிழைகள், ஓட்டைகளுடன் அதே நேரத்தில் டி-பேஸ் III ஐ விட பெருமளவில் அதிக விலை இவை எல்லாம் சேர்ந்து சந்தையில் பெரும் சரிவு ஏற்படுத்த அதன் பின் வந்த டி-பேஸ் IV v1.1 கூட சரிவை நிறுத்த இயலாமல் போர்லண்ட் நிறுவனத்தால் விழுங்கப்பட்டு இன்று ஒன்றும் இல்லாமல் போனது.

....தொடரும்....

மிக மோசமான நுட்பத் தயாரிப்புகள்--பகுதி 1

2006-10-22T09:23:00.000+03:00

1. அமெரிக்கா ஆன்லைன் (1989-2006)

1989ல் ஒரு சாதாரண மடலாடற்குழுவாக தொடங்கப்பட்ட இது, கடும் சர்ச்சைக்குரிய விளம்பர உத்திகளால் பெரும் வெற்றி பெற்றாலும் உலகின் மாபெரும் இணைய சேவை வழங்கிக்கு இனிய அனுபவங்கள் இல்லை. ஆங்காங்கே இலவச வழங்கிகள் வந்துவிட்ட போதிலும் மோசமான வாடிக்கையாளர் சேவை, கட்டுக்கடங்கா எரிதம் போன்றவற்றால் தலைவலிக்குள்ளானது. சேவையை நிறுத்தச் சொன்ன பயனாளர்களை நிறுத்தாமல் மேன்மேலும் கட்டணம் வசூலித்த வழக்கில் 2005 ஆகஸ்டில் 1.25 மில்லியன் டாலர்கள் அபராதம் கட்டியது.

2. RealNetworks RealPlayer (1999)

"இந்த ஒலிக்கோப்பை உங்களால் கேட்க முடியாது, இந்த கோடெக்கைத் தரவிறக்கம் செய்யுங்கள்..... மன்னிக்கவும் இந்தக் கோடெக் எங்களிடம் இல்லை" இது போன்ற பல செய்திகளை ரியல்பிளேயரில் பார்த்திருப்பீர்கள். ஒரு உளவு மென்பொருளைப் போல எரிச்சலூட்டும் (இன்றும் தொடரும்) விளம்பரங்கள், இவையெல்லாம் ஒரு சிறு துளி தான். ரியல் ப்ளேயரின் பெரும் அபாயம் (Terms & Conditions-ல் சொல்லாமலே) அது தரவிறக்கும் ஒவ்வொரு பயனருக்கும் தனி எண் அளித்து அதன் மூலம் அவரின் பொழுதுபோக்கை அறியும் தன்மை பலரைப் பெரும் அதிர்ச்சிக்குள்ளாக்கியது. எனினும் இது மைக்ரோசாஃப்டின் மீடியாப்ளேயருக்குச் சரியான போட்டி அளித்தது என்றால் மிகையில்லை.

3. Syncronys SoftRAM (1995)

"உங்கள் கணினியில் மெமரி குறைவாக உள்ளதா? கவலை வேண்டாம். எங்களின் இந்த மென்பொருளை உபயோகித்தால் வேறெதுவும் செய்யாமலேயே உங்களுக்கு இருமடங்கு மெமரி கிடைக்கும்" என கவர்ச்சிகரமான விளம்பரத்தோடு வந்த மென்பொருள். இறுதியில் கணினியின் ஹார்ட்டிஸ்க் பேஜிங் அளவை அதிகரிப்பது கண்டுபிடிக்கப்பட்டு அவமானம், அபராதத்திற்கு உள்ளாகி இன்று ஒன்றுமில்லாமல் போனது.

4.Microsoft Windows Millennium (2000)

இது யாருக்காவது நினைவில் இருக்கிறதா? மைக்ரோசாஃப்டின் இயங்கு தள வெளியீட்டிலேயே மிக மோசமான ஒன்று. Windows ME என்பதை Windows Mistake Edition என்றாலும் சரியே! ஆனாலும் பிற்காலத்தில் XP யில் பிரபலமான System Restore தத்துவம் இதில் தான் பிறந்தது. அதிலும் ஒரு சிக்கல். ஏதேனும் ஒரு கோப்பை வைரஸ் பாதித்து அதனை நீங்கள் கணினியிலிருந்து நீக்கியிருந்தால் அவையும் Restore செய்யப்படும், வைரஸ்களுடன்!!!! உண்மையில் Y2K என்றெல்லாம் மக்களைப் பூச்சாண்டி காட்டியது இந்த Millennium bug - ஐத் தானோ?

5.Sony BMG Music CDs (2005)

கடையிலிருந்து இந்த இசைக் குறுந்தட்டுகள் வாங்கி உங்கள் கணினியில் இட்டு நீங்கள் பாடல் கேட்க நினைத்தால் உங்களுக்கு இசையால் மனம் இளைப்பாறுவதற்குப் பதில் இரத்த அழுத்தம் எகிறும். காரணம் இசையினால் அல்ல; இந்த Sony BMG Music CDs ஓர் உளவு மென்பொருளை உங்களிடம் கேட்காமலேயே நிறுவிவிடும். இதற்கு அவர்கள் சொன்ன காரணம், காப்புரிமையாம். கொஞ்சூண்டு Hacking அறிவு உள்ள சிறு விளையாட்டுப் பிள்ளை கூட உங்கள் கணினியைக் கைகடத்தல் செய்ய இயலும் இந்த மென்பொருள் உங்கள் கணினியில் உட்கார்ந்து விட்டால்.

தொடரும்...

நன்னான்கு அல்லது நவ்வாலு!

2006-05-03T08:08:00.000+03:00

நண்பர் கவிஞர் இப்னு ஹம்துன் அப்படி என்ன என்னுடைய இவ்வலைப்பதிவில் கண்டாரோ தெரியவில்லை, சும்மா இருந்த என்னை 'நாலு' விளையாட்டிற்கு அழைத்து இழுத்து விட்டு விட்டார்.

சரி சொல்லுவதற்கு (உருப்படியாய்) நான்கு செய்திகள் இல்லை என்றாலும் எனக்குப் பிடித்த நான்கு வானூர்தித் தளங்களைக் குறிப்பிடலாம் என உள்ளேன்.

1. காய் டெக் (Kai Tek), ஹாங்காங்:

மிகவும் சிக்கலான தரையிறங்கும் முறை கொண்ட தற்போது மூடப்பட்டுவிட்ட ஒரு விமானத்தளம். விமானி வானூர்தியைத் தரையிறங்க இறுதித் தரைதொடலுக்கு (Final approach) ஆயத்தமாக 30 வினாடிகளே அவகாசம் உள்ளதாகக் கேள்விப்பட்டிருக்கிறேன். இன்றும் விமானிகளின் CPL உரிமப் புதுப்பிப்புத் தேர்வில் காய் டெக் மாதிரி (Simulation) இடம்பெறுகிறது என்றும் கேள்விப்பட்டுள்ளேன். இது தற்போது மூடப்பட்டு விட்டதால், புதிய விமானத்தளம் தற்போது செக் லப் காக் (Chek Lap Kok) எனும் இடத்தில் இயங்கி வருகிறது. கத்தாய் பசிபிக் வானூர்திச்சேவை நிறுவனத்தின் தாயகத் தளமாகவும் இது உள்ளது.

2. சாங்கி (Changi), சிங்கப்பூர்

சிங்கப்பூர் சென்று வந்தவர்கள் அல்லது சிங்கப்பூரில் பணி புரிபவர்கள் சாங்கி வானூர்தித்தளம் குறித்து ஒருமுறையேனும் வியக்காமல் இருக்க இயலாது. முனையங்களுக்கு இடையேயான போக்குவரத்துக்கு இங்கு உபயோகப் படுத்தப்படும் ஸ்கைட்ரைன் முதலில் இங்கு தான் பார்த்தேன். சிங்கப்பூர் வானூர்திச்சேவை நிறுவனத்தின் தாயகத் தளம் இது.

3. ஷிபோல் (Schiphol), ஆம்ஸ்டர்டாம்

ஐரோப்பாவிலிருக்கும் மிகப்பெரிய வானூர்தித்தளங்களுள் ஒன்று. ஷிபோல் என்பது ஒரு தனி சிறு நகரமாக உருவெடுத்துள்ளது. கிட்டத்தட்ட ஏழு ஓடுபாதைகளைக் (இன்னும் மூன்று கட்டிக் கொண்டிருப்பதாகக் கேள்வி!) கொண்டுள்ளது. வான்குழு (Skyteam) எனப்படும் வானூர்திச்சேவை ஒத்துழைப்புக் குழுமத்தின் முக்கிய உறுப்பினரான கேஎல்எம் (KLM) வானூர்திச்சேவை நிறுவனத்தின் தாயகத் தளம் இது. ஆம்ஸ்டர்டாம் நகரத்துடன் மிக வசதியான சாலை மற்றும் இருப்புப்பாதை இணைப்பு கொண்டுள்ளது. நகரத்திற்கு செல்ல வானூர்தித் தளத்தின் சுரங்கப் பாதைக்குச் சென்று நெதர்லாந்து ரயில் போக்குவரத்து நிறுவனத்தின் தொடர்வண்டிகள் மூலம் 15 நிமிடங்களுக்குள் நகர மையத்தை அடையலாம்.

4. துபை (Dubai), துபை.

அரபு அமீரக ஒன்றியத்திலிருக்கும் இவ்வான்தளத்தை அறியாதவர் மிகச் சிலரே. துபை ஒரு மிக முக்கிய சுற்றுலா நகரமாக மாறி வருகிறது.

இந்நகரில் ஆண்டு முழுவதும் ஏதாவது ஒரு விழா நடந்து கொண்டுதான் இருக்கிறது. எமிரேட்ஸ் எனப்படும் துபைக்குச் சொந்தமான வானூர்திச் சேவை நிறுவனத்தின் தாயகத் தளம் இது. தற்போது உலகக் கால்பந்துக் கோப்பைக்கான அதிகாரப்பூர்வ வானூர்திச் சேவை எனும் படிநிலை (Status) கிடைத்துள்ளதால், துபை மேலும் அதிக வானூர்திச் சேவைகளைக் காணும்.

முதலில் தமிழ்நாட்டிலிருக்கும், சென்னை, கோவை, மதுரை, திருச்சி வானூர்தித்தளங்களைப் பற்றித் தான் எழுதத் தொடங்கினேன். இருப்பினும் அவற்றைப் பற்றி நம்மில் பலருக்குத் தெரிந்திருப்பதால் இப்படி வேறு கோணத்தில் நான்கு வானூர்தித் தளங்களைத் தேர்ந்தெடுத்து எழுதியுள்ளேன். தூத்துக்குடியில் கூட ஒன்று இருப்பதாக அறிகிறேன்.

தெய்வவாக்கின் புதிய இயங்கு தளம்...?

2006-04-18T08:47:00.000+03:00

தெய்வவாக்கு (Oracle) நிறுவனம் ஒரு புதிய இயங்குதளத்தை வெளியிட எண்ணியுள்ளது. இது லினக்ஸ் அடிப்படையிலானதாக இருக்கும் என்றும் அந்நிறுவனம் கூறியுள்ளது.

லேரி எலிசன் (Larry Ellison) இது குறித்து கூறும் போது, நுண்மென்மை (Microsoft) நிறுவனத்தின் இயங்குதளச் சந்தையில் போட்டி போடவே இவ்வாறு எண்ணியுள்ளதாகக் கூறியுள்ளார்.

மைக்ரோசாஃப்ட் நிறுவனம் போலவே இயங்குதளத்துடன், பல்வகைச் செயலிகளை விற்கும் நிறுவனமாக ஆரக்கிளை உருவாக்கப் போவதாக லேரி கூறியுள்ளார்.

"லினக்ஸ் அடிப்படையிலான ஓர் இயங்குதளம் எங்கள் தயாரிப்புகளுக்கு வலு சேர்க்கும், மேலும் எங்களால் வீரியத்துடன் சந்தையில் போட்டி போட இயலும்" என்றும் அவர் கூறினார்.

சரி இதற்காக அவர்கள் ஒரு புதிய இயங்குதளத்தை எழுதப் போகிறார்களா என்றால் அதன் பதில் இல்லை என்பதே. சூசி என்றொரு லினக்ஸ் நொவேல் என்னும் நிறுவனத்தால் விழுங்கப் பட்டதே, நினைவில் உள்ளதா? அதனை இப்போது வாங்கி ஆரக்கிள் இயங்குதளம் என சந்தைப் படுத்தப் போகிறார்களாம்.

செந்தொப்பிக்கு அடுத்த நிலையில் லினக்ஸ் இயங்குதளச் சந்தையில் இருப்பது சூசி என்பது பலருக்குத் தெரிந்திருக்கலாம்.

The Power of Oracle on Windows என்று பல இடங்களில் விளம்பரம் பார்த்தது நினைவுக்கு வந்து தொலைக்கிறது.....! விண்டோஸ் இயங்குதளத்திலிருக்கும் ஆரக்கிளுக்கு சாந்து பூசும் (patch) வேலை செய்த (இனிய) அனுபவம் யாருக்காவது இருக்கிறதா?

மின்மடல் வைரஸ்களைக் கண்டறிய / தடுக்க...

2006-04-14T23:44:00.000+03:00

இப்போதெல்லாம் மின்மடலில் ஸ்பேம்கள் வந்துசேராத மின்முகவரிகளே இல்லை எனலாம். (என்னிடம் இருக்கும் ஒரு முகவரிக்கு இன்று வரை இதுவரை இவ்வகை மடல்கள் வந்ததில்லை. அம்முகவரியை இங்கே இட்டால் அதோடு இந்தப் பெருமை பணால் ஆகிவிடும் என்பதால் இடவில்லை).

இவ்வகையான ஸ்பேம்களை பொதுவாக இருவகைப் படுத்தலாம். பெருந்தீங்கு விளைவிப்பன மற்றும் சிறு தீங்கு விளைவிப்பன என்று.

(உங்கள் கணினியின் கோப்புகளை அழித்தல், திருடுதல் போன்ற வேலை செய்யும்) வைரஸ்கள், புழுக்கள், ஃபிஷிங் (தமிழில் இதற்கு என்ன சொல்லலாம்?) இன்னும் இதே போன்ற இன்ன பிற போன்றவை பெருந்தீங்கு விளைவிக்கும் ஸ்பேம்கள் என்றும் உங்கள் கணினியில் செயல் திறனைக் குறைத்து, கணினி இணைப்புகளில் தேவையற்ற செய்திகளை அனுப்பி மொத்த கணினித் தொகுப்பின் வேகத்தைக் குறைக்கும் வேலை செய்வனவற்றைச் சிறு தீங்கு விளைவிப்பன என்றும் நான் குறிப்பிடுகிறேன். இவ்வகையில் எரிச்சலை ஏற்படுத்தும் இலவச பட்டங்கள், பட்டயங்கள், இன்னும் எழுத முடியாத பல அனைத்தையும் உள்ளடக்கி வரும் விளம்பரங்களையும் சேர்த்துக் கொள்ளலாம்.

இவற்றைக் கண்டறிந்து இவற்றின் தாக்குதல்கள், தீய பின் விளைவுகளிலிருந்து தற்காத்துக் கொள்ள சில எளிய வழிமுறைகள் உள்ளன. அவற்றை இவ்விடுகையில் கூற முயற்சிக்கிறேன்.

1. கண்டறிதல்:

ஆணைச் சாளரத்தின் மூலம் இயக்கவல்ல எந்த ஒரு கோப்புக்கும் பெரிய 'தடா' போட்டுவிடுங்கள். இவ்வகைக் கோப்புகளை இவற்றின் நீட்சியின் மூலம் கண்டறியலாம். இவை exe, pif, bat, com இன்னும் பல.

2. நோக்கம்:

எந்த ஒரு மின்மடல் இணைப்பையும் அதன் நோக்கம் அறிந்து திறப்பதை வழக்கமாகக் கொள்ளுங்கள். அனுப்புநர் நீங்கள் மிகவும் அறிந்த நபராக இருந்தாலும் சரியே. ஒருவேளை அனுப்புநரின் கணினி இவ்வகை வைரஸ் தாக்குதலுக்கு உள்ளாகியிருக்கக் கூடும்.

3. தேவை:

எந்த ஒரு இணைப்பும் உங்களுக்குத் தேவை இல்லை என்றால் திறக்க வேண்டாம். இருக்கவே இருக்கிறது 'அழி' பொத்தான்.

4. தற்காப்பு:

என் நண்பர் ஒருவர் நகைச்சுவையாகச் சொல்லுவார். 'உலகின் மாபெரும் சொத்தை மென்பொருளால் ஒருவர் பணக்காரராக முடியும் என்றால் அவர் பில் கேட்ஸ் தான்' என்று. இதில் எந்த அளவு உண்மை உள்ளது என்கிற விவாதத்திற்குள் நான் செல்ல விரும்பவில்லை. நாம் விரும்பியோ விரும்பாமலோ சாளரம் (Windows) மென்பொருள் ஆயிரக்கணக்கான ஓட்டைகளுடன் (vulnerabilities) உள்ளது. அவற்றை அவ்வப்போது அடைக்க நுண்மென்மை (Microsoft) பல சாந்துக் கலவைகளை (patches) நமக்குத் தந்து கொண்டிருக்கிறது. அவற்றின் மூலம் முடிந்த வரை ஓட்டைகளை அடைத்து வைத்திருப்பது நல்லது தானே. நீங்கள் வெளிநோக்கு (Outlook) வைத்திருந்தால் உங்களுக்கு இந்த வேலை மிக இன்றியமையாதது ஆகும்.

நீங்கள் யூடோரா பயனாளர் என்றாலும், வலைவெளி மடல் (Netscape Mail) பயனாளர் என்றாலும், பறக்கும் குதிரை (Pegasus) பயனாளர் என்றாலும் இந்த சாந்து பூசும் (வேலையத்த!) வேலை இன்றியமையாதது.

இந்த எளிய முறைகளைப் பின்பற்றி மகிழ்வுடன் பாதுகாப்பாக மின்மடல் படியுங்கள்.

பி.கு: சாளரம் மட்டுமே ஏதோ பெரும் ஓட்டைகளுடன் இருப்பது போலவும், அதற்குச் சவால் விடும் லினக்ஸ் ஏதோ கனவுலக இயங்கு தளம் போலவும் பல அன்பர்கள் மாயையில் இருக்கிறார்கள். அதில் ஓரளவு மட்டுமே உண்மையுள்ளது என்பதை இங்குத் தெரிவித்துக் கொள்கிறேன்.

நன்றிகள் பல...!

2006-02-20T12:56:00.000+03:00

இன்றைய தினமலர் நாளிதழிலும் தேன்கூட்டிலும் என்னுடைய இந்த வலைப் பதிவு குறிப்பிடப் பட்டுள்ளது. இதனால் என் வலைப் பதிவிற்கு வரும் விருந்தினர் எண்ணிக்கை அதிகரித்தும் உள்ளது.

தினமலர் நாளிதழுக்கும் தேன்கூடு நிர்வாகிகளுக்கும் எனது நன்றிகளைத் தெரிவித்துக் கொள்கிறேன்.

இதனை முதலில் எனக்குத் தெரியப் படுத்திய திரு. மாயவரத்தான் அவர்களுக்கும், திரு. நாமக்கல் சிபி அவர்களுக்கும் முதற்கண் நன்றி.. தொடர்ந்து தனிமடலிலும் வாழ்த்துகளைத் தெரிவித்த அன்பு உள்ளங்களுக்கும் நன்றி..

தொடர்ந்து ஆதரவு தர வேண்டுமாய் வேண்டுகோளுடன்.....

சாளரத்தின் கடவுச்சொல் மறந்தால்...?

2006-02-09T22:58:00.000+03:00

தலைப்பைப் பார்த்த மாத்திரத்தில் கவிதை, பின் நவீனத் துவம் என்று ஓடி வந்திருந்தால் மன்னிக்கவும். இந்த இடுகை சாளரம் னுப (அதாம்பா விண்டோஸ் xp,.. நற நற.. இத முதல்லேயே தெளிவா சொல்லிருக்கலாம்ல..) எனும் இயங்கு தளத்தின் சகல உரிமைகளும் கொண்ட பயனரான நிர்வாகி (Administrator) கடவுச்சொல் மறந்துவிட்டால் என்ன செய்வது என்பது குறித்தது.

இப்போதெல்லாம் பாதுகாப்புக் கொள்கை (Security policy) என்கிற பெயரில் மூன்று அல்லது நான்கு முறை சரியாக கடவுச்சொல் அளிக்கவிட்டால் பல நிறுவனக் கணினிகளில் பூட்டு விழும் (Account lockout) தலைவலியும் இருப்பதால் இது சற்றுக் கடினமான காரியம் தான்.

இதற்குச் சில வழிகள் உள்ளன. முதலாவது மிகச்சுலபம். வேறு ஒன்றுமில்லை திரும்பத் திரும்ப யோசித்து கடவுச்சொல் நினைவுக்கு வருகிறதா எனப் பார்ப்பது

இரண்டாவது அந்தக் கணினியில் நிர்வாகிக்கு நிகரான பயனர் கணக்கு இருந்தால் அதன் மூலம் உட்புகுந்து இச்சிக்கலைச் சரி செய்யலாம்.

மூன்றாவது முற்றிலும் அழித்துப் புதிதாக இயங்கு தளத்தை நிறுவுவது (அட அது தான் எல்லாருக்கும் தெரியுமே)

நான்காவது மிகக்குறைவாகவே அறியப் பட்டுள்ள வழிமுறையாகும். ஆனால் இம்முறைக்கு உங்களிடம் தரவுத்தள நிறுவிக் குறுந்தகடும், சாவியும் (Key) வேண்டும்.

குறுந்தகட்டை கணினியின் வட்டு இயக்கியில் (CD-ROM Drive) இட்டு கணினியைத் தொடக்கவும். கணினி குறுந்தகட்டில் உள்ள நிறுவியைத் (Installer) தொடக்கும். வரவேற்புத் திரை (Welcome Screen) வந்தவுடன் Enter சாவியை அழுத்தி அடுத்துவரும் உரிம ஒப்பந்தத்தை (எத்தனை பேர் முழுவதும் படிக்கிறீர்கள்?) ஏற்றுக் கொள்ளுங்கள்.

தற்போது நிறுவி உங்களுக்கு புதிதாக நிறுவு (Install) மற்றும் சரிசெய் (Repair) என்கிற தெரிவுகளை அளிக்கும். R எனும் சாவியை அழுத்தி சரிசெய் முறையைத் தொடங்குங்கள். சரிசெய்யும் நிலை முடிந்ததும் தங்களின் கணினியை மீள்தொடக்கம் செய்யவும்.

குறுந்தகட்டை இப்போது வட்டு இயக்கியில் இருந்து வெளியில் எடுத்துவிடவும். மீண்டும் தொடங்கும் நிறுவி சரிசெய் செயலியைத் தொடரும். திரையின் இடது கீழ் மூலையில் Installing Devices என்கிற பட்டியைக் காணும் பொழுது Shift-F10 சாவித் தொகுப்பை அழுத்துங்கள். தற்போது கட்டளைக்காட்டி (Command Prompt) திரையில் தோன்றும்.

அதில் NTUSRMGR.CPL என்று தட்டச்சி, Enter சாவியை அழுத்துங்கள். தற்போது பயனர் கணக்கு பயன்பாட்டுச் செயலிக்குட்டி (User Accounts Applet) திரையில் தோன்றும். இப்போது நீங்கள் நிர்வாகிப் பயனர் கணக்கைத் தேர்ந்தெடுத்து அதன் கடவுச்சொல்லை மாற்றவோ அல்லது நீக்கவோ இயலும். வேலை முடிந்ததும் செயலிக்குட்டியை மூடி கட்டளைக்காட்டியிலிருந்தும் வெளியேறவும்.

சரிசெய்யும் வேலை (Repair process) முடியும் வரைக் காத்திருந்துப் பின்னர் கணினியை மீள்தொடக்கம் செய்யவும். புதிய கடவுச்சொல்லுடன் தற்போது நீங்கள் உள் நுழையலாம்

கொசுறு: கடவுச்சொல் மறக்காமலிருக்க ஏதேனும் வழி உள்ளதா? இல்லாமலா? உங்களுக்குத் தெரிந்த உபாயங்களைப் பின்னூட்டுங்கள்.. எனக்குத் தெரிந்ததைப் பின்னர் சொல்கிறேன்.

மூளைக்கு வேலை - ஆங்கிலப் புதிர்

2006-01-23T10:14:00.000+03:00

பழைய மின்மடல்களில் ஒரு குறிப்பிட்ட செய்தியைத் தேடும் போது இந்தப் புதிர் சிக்கியது. முயன்று பாருங்கள். இதனைத் தமிழில் மொழி பெயர்த்தால் சில வினாக்கள் பொருள் இழந்துவிடும் என்பதால் அப்படியே ஆங்கிலத்தில் தருகிறேன்.

1. There is one word in the English language that is always pronounced incorrectly. What is it?

2. A man gave one son 10 cents and another son was given 15 cents. What time is it?

3. A boat has a ladder that has six rungs, each rung is one foot apart. The bottom rung is one foot from the water. The tide rises at 12 inches every 15 minutes. High tide peaks in one hour. When the tide is at it's highest, how many rungs are under water?

4. There is a house with four walls. Each wall faces south. There is a window in each wall. A bear walks by one of the windows. What color is the bear?

5. Is half of two plus two equal to two or three?

6. There is a room. The shutters are blowing in. There is broken glass on the floor. There is water on the floor. You find Sloppy dead on the floor. Who is Sloppy? How did Sloppy die?

7. How much dirt would be in a hole 6 feet deep and 6 feet wide that has been dug with a square edged shovel?

8. If I were in Hawaii and dropped a bowling ball in a bucket of water which is 45 degrees F, and dropped another ball of the same weight, mass,and size in a bucket at 30 degrees F, both of them at the same time, which ball would hit the bottom of the bucket first? Same question, but the location is in Canada?

9. What is the significance of the following: The year is 1978, thirty-four minutes past noon on May 6th.

10. What can go up a chimney down, but can't go down a chimney up?

11. If a farmer has 5 haystacks in one field and 4 haystacks in the other field, how many haystacks would he have if he combined them all in the center field?

12. What is it that goes up and goes down but does not move?

தங்களின் பதில்களை ஆங்கிலத்திலோ அல்லது தமிழிலோ தரலாம். முயற்சி உடையார் இகழ்ச்சி அடையார்.

இருவழி ஆடி உண்மையா?

2006-01-02T20:50:00.000+03:00

திரு. முருக பூபதி தன்னுடைய பதிவில் இருவழி ஆடி என்று ஒன்று தங்கும் விடுதிகளில் பயன் படுத்தப் படுவதாகவும் நாம் கவனமுடன் இருக்க வேண்டும் என்றும் எழுதியிருந்தார். இது போன்ற மின் மடல்கள் எனக்கும் பல வந்துள்ளன. நானும் இதனை எவ்வாறு கண்டறிவது என்று உறுதி செய்திருந்தேன். என்னை உஷார் படுத்தும் நண்பர்களுக்கு அதனை விளக்கியும் சொல்லியிருந்தேன். அதுவும் இது தற்போதைய ஒரு பிரபல நபரையும் விவகாரத்திற்கு உள்ளாக்கியவுடன் இது குறிப்பாக நம் மக்களிடையே உயிர் பெற்று உலா வருகிறது. இந்த "உஷார்" மடல் தோராயமாக இந்தத் தொனியில் இருக்கும்.

Plz... spend some time to read this, this is very very important Have you seen recent advertisement of xxxxxx (பெயரை மறைத்து விட்டேன்) GLASSES shown in TELEVISIONS - Then you must have known about 2 Way mirror & is also shown in Hindi Movie HUMRAAZ. How to determine if a mirror is 2 way or not. (Not a joke!) Not to scare you, but to make sure that you aware. Many of the hotels and textile showrooms cheat the customers this way & watch privately. HOW TO DETECT A 2-WAY MIRROR When we visit toilets, bathrooms, hotel rooms, changing rooms, etc., how many of you know for sure that the seemingly ordinary mirror hanging on the wall is a real mirror, or actually a 2-way mirror i.e., they can see you, but you cant see them).There have been many cases of people installing 2-way mirrors in changing rooms or bathroom or bedrooms. It is very difficult to positively identify the surface by just looking at it. So, how do we determine with any amount of certainty what type of mirror we are looking at? CONDUCT THIS SIMPLE TEST: Place the tip of your fingernail against the reflective surface and if there is a GAP between your fingernail and the image of the nail, then it is a GENUINE mirror. However, if your fingernail DIRECTLY TOUCHES the image of your nail, then BEWARE, IT IS A 2-WAY MIRROR!(there is someone seeing you from the other side). So remember, every time you see a mirror, do the "fingernail test". It doesn't cost you anything. It is simple to do. This is a really good thing to do. The reason there is a gap on a real mirror is because the silver is on the back of the mirror UNDER the glass. Whereas with a two-way mirror, the silver is on the surface. Keep it in mind!. Share this with your sisters, wives, daughters, friends, colleagues சரி இது உண்மையா இந்த விரல் நக சோதனை பலனளிக்குமா? இதனை சற்றே ஆராய்வோம். இவ்வாறு இருவழி (அல்லது ஒரு வழி?) ஆடிகள் ஒரு புறம் இருப்பதை மறுபுறம் காட்ட வேண்டும் என்றால், பார்க்கப் படும் புறத்தின் ஒளிச் செறிவு பார்க்கும் புறத்தின் ஒளிச்செறிவை விட அதிகமாக இருந்தாலே சாத்தியம். ஒளியளவு மாறும் போது பார்க்கும் மற்றும் பார்க்கப் படும் இடங்களும் மாறும். எனவே இதனைக் கண்டுபிடிக்க 'விரல்நகச்' சோதனையை விட அறையின் அனைத்து விளக்குகளையும் அணைத்து விட்டு, நாம் ஐயுறும் ஆடியின் முன் நின்று கூர்ந்து கவனித்தால் இதனை அறிய இயலும். இவ்வாறு இருபுறமும் ஒளி புகுமாறு அமைக்கப் படும் ஆடிகள் 'மிர்ரோபேன்' (Mirropane) என்று அறியப் படுகின்றன. சந்தையிலிருக்கும் மிர்ரோபேன் ஆடிகள் 12 விழுக்காடு மறுபுற ஒளியை அனுமதிக்க வல்லன. இவை நிர்மாணிப்பது சம்பந்தப்பட்ட விடுதிகளுக்கு கட்டுபடியாகுமா என்பது வேறு செய்தி. எனவே அடுத்தமுறை விடுதியில் தங்கும் போது இந்த ஐயம் உங்களுக்கு எழுந்தால், விரல்நுனிச் சோதனையை விட ஒளிச்செறிவு சோதனையை செய்து நிம்மதியாகத் தங்குங்கள். மேலும் தகவல்களுக்கு இங்கே அணுகவும்

குறிப்பில் ஊக விளையாட்டு (KlueLess)

2005-12-29T09:35:00.000+03:00

இந்தோரிலிருக்கும் இந்திய மேலாண்மைக் கழக விழாக் கொண்டாட்டங்களுக்காக உருவாக்கப் பட்ட இந்த விளையாட்டு மோகன்தாசு, தேசிகன், சுரேஷ் மற்றும் இன்னபிற வலைப் பதிவர்களால் முடிக்கப் பட்டதாக குறிப்பிடப் பட்டது. கடந்த இரு நாட்களாகப் போராடி (?) ஒரு வழியாக முடித்து விட்டேன். கடைசிப்பக்கம் வேறு மாதிரியாக இருந்தது. இதனைப் போலவே வேறொருவர் திரு. தேசிகனின் பதிவில் கேள்வி எழுப்பி இருந்தார், எனவே எனக்குக் கிடைத்த பக்கம் தான் தற்போதைக்குக் கடைசியானது என்பதும் இந்த விளையாட்டிற்கு நினைவுப் பரிசுகள் அளிப்பது முடிவுற்றது என்பதும் உறுதியாகி விட்டது. உங்களில் எத்தனை பேர் முடித்து விட்டீர்கள்?

பி.கு:
1.இவ்விளையாட்டிற்கு வழக்கத்தை விட்டு சற்றே மாற்றாக சிந்திக்க வேண்டும்.
2. எல்லாருக்கும் எல்லாமும் தெரிந்திருக்கும் வாய்ப்புகள் குறைவே என்பதால் நண்பர்களின் உதவியும் அவசியம்.
3. இவ்விளையாட்டு விருப்பமில்லாதோருக்கு ஒரு வெட்டி வேலையாகத் தோன்றலாம்.

தன் நலன் அறியும் ஊர்திகள்

2005-12-14T22:34:00.000+03:00

தானியங்கி ஊர்திகள் தொழில் நுட்பம் மிக வேகமாக வளர்ந்து வருகிறது. இதில் தற்போது உருவாக்கப் பட்டுள்ள மாதிரி (Prototype) ஒன்றில் ஏதாவது ஒரு பாகம் பழுதடைந்துள்ளதா எனத் தானே சோதித்து அறியும் தொழில் நுட்பமும், அதோடு பழுதான பாகம் எவ்வளவு தூரம் அல்லது நேரம் தாங்கும் என்பதையும் அறிய இயலும்.

ஆர்லண்டோவிலுள்ள பன்னாட்டு எந்திரப் பொறியியற் குழுமம் மற்றும் காட்சியகத்தைச் சேர்ந்த டக்ளஸ் ஆடம்ஸ் மற்றும் முஹம்மது ஹாரூன் எனும் இரு பொறியாளர்கள் சமர்ப்பித்த ஆய்வுக் கட்டுரையில் இத் தொழில்நுட்பத்தை அலசியுள்ளனர். "ஊர்திகளில் உள்ள எரிபொருள் காட்டிகளைப் போலவே ஊர்திகளிலுள்ள பிற பாகங்களின் நலனை அறிதல் தகுந்த உணர்வி மற்றும் காட்டிகளின் மூலம் சாத்தியமே" என்று கூறுகின்றனர்.

சில ஊர்திகளில் இவ்வகை உணர்விகளையும் காட்டிகளையும் அமைத்து அவற்றின் சில வன் திருகுகள் (nuts and bolts) சிலவற்றை சரியாக முதலில் பொருத்தியும் பின்னர் அவற்றை சரியாகப் பொருத்தாமலும் உண்டாகும் அதிர்வுகளை ஒரு செயலி (software program) கொண்டு அலசுவதின் மூலம் குறைபாடுகளைக் கண்காணிக்க இயலும் என நிரூபித்துள்ளனர்.

இவ்வதிர்வுகள் இதயத் துடிப்புகளைப் போல ஊர்திகளின் நலனைக் காட்டின என்று இவர்கள் கூறியுள்ளனர்.

இத் தொழில்நுட்பத்தைக் குறித்து அமெரிக்க இராணுவ ஊர்தி ஆய்வு மற்றும் வளர்ச்சி மையத்தைச் சேர்ந்த பால் டெக்கர் என்பவர் கூறும் போது, இது இராணுவ ஊர்திகளுக்கு அவற்றின் நலனை முன்கூட்டி அறியும் விதத்தில் மிகுந்த பயன் தரக் கூடியதாக இருக்கும் எனத் தெரிவித்துள்ளார்.

இச்செய்தி சேகரிக்கப் பட்ட தளத்திற்கான சுட்டி

http://dsc.discovery.com/news/briefs/20051128/selfcar_tec.html

இந்த நவீன தொழில்நுட்பம் வணிக அளவில் வெற்றி பெறுமா? போயிங் 747 பெரு வானூர்தி அமெரிக்க இராணுவத்திற்காகத் தயாரிக்கப் பட்ட ஒரு தோல்வியடைந்த திட்டப் பணி (Project) என்பது நம்மில் எத்தனை பேருக்குத் தெரியும்? பின்னர் அதனை போயிங் வணிக அளவில் பெரு வெற்றியாக மாற்றியது என்பது நான் கூறவேண்டியதில்லை..

கூகிள் பூமி (Google Earth) போரடித்துவிட்டதா?

2005-11-13T20:44:00.000+03:00

வலைப்பதிவுகளில் கூகிள் பூமி பலராலும் எழுதப்பட்டு பார்க்கப் பட்டு வியக்கப் பட்டு தற்போது சிலருக்கு சலிப்பையும் ஏற்படுத்தி இருக்கலாம். இனி நமது இயற்கைத் துணைக்கோளான சந்திரனை ஆராயலாமா?

மனிதர்களை 2018ல் மீண்டும் நிலவுக்கு அனுப்பும் முயற்சியில் ஈடுபட்டு வரும் நாசா, 1.8 மில்லியன் நிழற்படங்களைத் தொகுத்து உலக வளி (World Wind) என்றொரு செயலியை இலவசமாக வழங்கி இவ்வனுபவத்தைத் தங்களுக்கு வழங்குகிறது..

இதுகுறித்து மேலதிகத் தகவல்களை இங்கே காணலாம்.

http://dsc.discovery.com/news/briefs/20051031/space_moonshot.html

நாசாவின் இந்த இலவச செயலியைத் தரவிறக்கம் செய்ய இங்கு செல்லுங்கள்

http://worldwind.arc.nasa.gov/

எப்படி இருந்தது எனப் பின்னூட்டத்தில் சொல்லுங்கள்

Avian Flu - பறவை ஃப்ளூ

2005-10-21T15:02:00.000+03:00

இன்றைய தேதியில் உலகில் பரபரப்பை ஏற்படுத்திக் கொண்டிருக்கும் ஒரு பயங்கரத் தொற்று நோய் Avian Flu அல்லது Bird Flu என்று அறியப் படும் பறவை ஃப்ளூ. ஆசியாவின் பெரும்பகுதிகளில் பல பறவைகளையும் 60க்கும் மேற்பட்ட மனிதர்களையும் பலி கொண்ட இந்நோய் காற்றில் பரவக்கூடியது.

முதலில் ஃப்ளூ அல்லது இன்ஃப்ளூயன்சா எனப்படும் ஒரு மிகச்சாதாரணமான ஒரு நோய் எவ்வாறு பரவுகிறது என்பதைத் தெரிந்து கொண்டால் வைரஸ்கள் பரவும் முறையை அறிந்து கொள்ள இயலும். வைரஸ் என்ப்படுவது புரத உறைகளில் சூழப்பட்ட மரபணுக்கள் என்று சுருக்கமாக விளங்கிக் கொள்ளலாம். இவை பாக்டீரியங்களைப் போலத் தாமாகப் பல்கிப் பெருகுவதில்லை. இவை தம்மை பிற விலங்குகளின் செல்களின் சுவர்களில் இணைத்து, மரபணுக்களை செல்லினுள் செலுத்துகின்றன. இவ்வாறு செலுத்தப்பட்ட மரபணுக்கள் செல்லில் உள்ள மூலக்கூறுகளினால் பல்கிப் பெருகி பல வைரஸ்களாக மாறுகின்றன. இவ்வாறு பாதிக்கப்ப்டுவது மூச்சு மண்டலம் என்றால் அது இன்ஃப்ளுயன்சா எனப்படும்.

தர்போது பரபரப்பாகப் பேசப்படும் எச்5என்1 என்ற குறியீடுள்ள வைரஸ் பறவைகளைப் பாதிக்கக் கூடியது. இவை மனிதர்களை எளிதில் பாதிப்பதில்லை என்பதாக இதுவரை நம்பப்பட்டு வந்தது. ஆனால் 2004ல் பல தென்கிழக்காசிய நாடுகளில் புலிகள், சிறுத்தைகள், பூனைகளப் பாதித்த இவ்வைரஸ் 60க்கும் மேற்பட்ட மனிதர்களையும் பலி கொண்டது. இக்குறியீடுள்ள வைரஸ்களுக்கு மனித உடலில் எதிர்ப்பு சக்தி இல்லை. எனவேதான் இந்நோய் மிகக் கொடுமையானதாகக் கருதப் படுகிறது. இவ்வகை வைரஸ் பறவைகளுக்குள் எவ்வாறு பரவுகிறது என்பதற்கு காட்டுப் பறவைகள் அல்லது புலம்பெயர் பறவைகள், நாட்டுப் பறவைகளுடன் தொடர்பு ஏற்படுவது தான் காரணம் என்பது தெரிய வருகிறது.

இவ்வகை நாட்டுப் பறவை அல்லது வீட்டுப் பறவைகளைக் கையாளுவோர் இந்நோயால் பெருமளவில் பாதிக்கப் படக்கூடிய சாத்தியக் கூறு உள்ளது. ஐரோப்பா உள்பட பல இடங்களில் இவ்வைரஸ்குறியீடு கண்ட இடங்களில் எல்லாம் பறவைகள் ஒட்டுமொத்தமாக அழிக்கப் படுகின்றன.

ஒரு கொசுறு கேள்வி: கோழியிறைச்சி உண்போருக்கு இவ்வைரஸ் பாதிக்கும் சாத்தியம் உள்ளதா என்பதற்குப் பதில் என்னவாக இருக்க முடியும்? உங்களுக்குப் பதில் தெரிந்தால் பின்னூட்டம் இடுங்கள்.

இந்தியாவில் எந்த ஊரில் இருக்கிறீர்கள்?

2005-09-20T13:11:00.000+03:00

மின்னஞ்சல் மூலம் வந்த ஒரு நகைச்சுவை

நீங்கள் இந்தியாவில் எந்த ஊரில் இருக்கிறீர்கள் என்பதைக் கண்டறிய ஒரு சிறு வழிகாட்டி. இது நகைச்சுவையேயன்றி எவர் ஊரையும் கிண்டலடிக்கும் நோக்கம் இல்லை.

1. இருவர் சண்டையிட்டுக் கொண்டுள்ளனர். மூன்றாமவர் ஒருவர் வருகிறார். தொடர்ந்து நான்காமவர் வருகிறார். இவ்விருவரும் சண்டையிட்டுக் கொண்டிருக்கும் இருவரில் யார் சரி என வாதத்தில் இறங்குகிறார்கள். நீங்கள் இருப்பது கொல்கத்தாவில்.

2. இருவர் சண்டையிட்டுக் கொண்டுள்ளனர். மூன்றாமவர் ஒருவர் வருகிறார். சண்டையிடுவோரைக் கண்டுகொள்ளாமல் தன் வழியே போகிறார். நீங்கள் இருப்பது மும்பையில்.

3. இருவர் சண்டையிட்டுக் கொண்டுள்ளனர். மூன்றாமவர் ஒருவர் வருகிறார். சண்டையிடுவோரை சமாதானப் படுத்த முயல்கிறார். சண்டையிடும் இருவரும் இணைந்து மூன்றாமவரை மொத்தி விடுகிறார்கள். நீங்கள் இருப்பது தில்லியில்.

4. இருவர் சண்டையிட்டுக் கொண்டுள்ளனர். ஒரு கூட்டம் கூடி சண்டையை வேடிக்கை பார்க்கிறது. மூன்றாமவர் ஒருவர் வருகிறார். அருகில் தேநீர்க்கடை ஒன்றைத் திறந்து வியாபாரம் செய்கிறார். நீங்கள் இருப்பது அகமதாபாத்தில்.

5. இருவர் சண்டையிட்டுக் கொண்டுள்ளனர். மூன்றாமவர் ஒருவர் வருகிறார். இவர்களின் சண்டை தீர செயலி (Program) ஒன்றை எழுதுகிறார். செயலியில் குறைபாடு (bug) உள்ளதால் சண்டை நின்ற பாடில்லை. நீங்கள் இருப்பது பெங்களூரில்.

6. இருவர் சண்டையிட்டுக் கொண்டுள்ளனர். ஒரு கூட்டம் கூடி சண்டையை வேடிக்கை பார்க்கிறது. மூன்றாமவர் ஒருவர் வருகிறார். இப்படி சண்டை போடுதல் அண்ணாவுக்கு (அறிஞர் அண்ணாவே தான்) பிடிக்காது என்கிறார். அனைவரும் கலைந்து செல்கின்றனர். நீங்கள் இருப்பது சென்னையில்.

7. இருவர் சண்டையிட்டுக் கொண்டுள்ளனர். இருவரும் சற்றே இளைப்பாறிவிட்டுத் தங்களின் செல்பேசியின் மூலம் தங்களின் ஆட்களைக் கூப்பிடுகிறார்கள். தற்போது 50 பேர் அவ்விடத்தில் சண்டையிடுகிறார்கள். நீங்கள் இருப்பது ஹைதராபாத்தில்.

8. இருவர் சண்டையிட்டுக் கொண்டுள்ளனர். ஒரு கூட்டம் கூடி சண்டையை வேடிக்கை பார்க்கிறது. ஒருவர் காவல் துறைக்குத் தொடர்பு கொண்டு நிலைமையை விளக்குகிறார். காவலர்கள் வந்தும் நிலைமை கட்டுக்கடங்காமல் போகவே தடியடி நடத்தப் படுகிறது. காவலர்கள் மீது கல்லெறி. பல கடைகள் நாசம். அடுத்த நாள் ஆளுங்கட்சியோ எதிர்க்கட்சியோ முழு அடைப்புக்கு அழைப்பு விடுக்கிறது. நீங்கள் இருப்பது திருவனந்தபுரத்தில்.

இந்த மடலை எனக்கு அனுப்பியவர் கேரளாவைச் சேர்ந்த ஓர் அன்பர். எனவே தான் திருவனந்தபுரத்தை இவ்வளவு 'பாசமாகக்' குறிப்பிட்டுள்ளார்.

உங்கள் கைகள் ஓர் ஒளி மூலம்

2005-09-18T13:49:00.000+03:00

மனிதக் கைகள் (ஏன் உங்கள் உடலின் பல பகுதிகள்) ஒளி மூலமாகச் செயல்படும் தன்மை வாய்ந்தவை என தற்போதைய ஓர் ஆய்வு தெரிவிக்கிறது. இதே ஆய்வு (தாவரங்கள் உட்பட) உயிருள்ள எந்தப் பொருளும் பல்வேறு அளவுகளில் ஒளி உமிழ வல்லது என்றும் தெரிவிக்கிறது. இந்த ஒளியளவானது குறிப்பிட்ட அவ்வுறுப்பின் நலனைப் (well being) பொறுத்து இருப்பதால், கீறா நோயறியும் (Non-invasive) முறையாக இம்முறை பயன் படுத்தப் படவும் வாய்ப்புள்ளது.

ஜப்பானில் உள்ள ஹமாமட்சு ஒளித்துகளியல் (Photonics) நிறுவனத்தில் உள்ள மைய ஆராய்ச்சி ஆய்வகத்தைச் சேர்ந்த மிட்சுவோ ஹிராமட்சு என்ற அறிவியலார் இக்கருத்தைக் கூறுகிறார். கைகள் மட்டுமன்றி, நெற்றிப் பரப்பும் பாதங்களும் ஒளியுமிழ வல்லவை என்று அவர் கூறுகிறார்.

விரல் நகங்கள் 60 ஒளித்துகள்களும், விரல்கள் 40 ஒளித்துகள்களும், உள்ளங்கைகள் 20 ஒளித்துகள்களும் உமிழ்ந்ததாக இவ்வாய்வில் கண்டறிந்தனர். இதனை Journal of Photochemistry and Photobiology B: Biology. இதழில் பிரசுரித்துள்ளதாகவும் ஹிராமட்சு தெரிவித்துள்ளார்.

கைகளில் குளிர்ந்த மற்றும் சூடான தண்ணீர் பாட்டில்கலைப் பிடிக்கச் செய்து இவ்வாறு உமிழப்படும் ஒளியளவு மாறுபடுவதையும் அவர்கள் கண்டார்களாம். கைகளைச் சுற்றி ஆக்சிஜன் அதிகமானாலோ, அல்லது கனிம எண்ணெயைத் தடவிக்கொண்டாலோ, உமிழப் படும்ஒளியளவு மாறுபட்டதாம் (அதிகரித்ததாம்).

மேலும் விரிவான செய்திக்கான சுட்டி : http://dsc.discovery.com/news/briefs/20050905/handlight.html

எல்லாம் சரி, எனக்கு என்ன தோன்றுகிறதென்றால், சிறு வகுப்புகளில் ஒரு பொருள் தனிச்சுழி வெப்ப நிலையை அடையும் வரை மின்காந்த அலைகளை உமிழ்ந்து கொண்டே இருக்கும் என்றும், தெர்மோ கிராஃபி என்னும் மருத்துவ ஆய்வு நம் உடலின் பல பகுதிகள் அகச்சிவப்புக் கதிர்களை வெவ்வேறு அளவுகளில் உமிழும் அடிப்படையில் நோய் கண்டறிய உதவுகிறது என்றும் படித்தது நினைவுக்கு வருகிறது. இந்தத் தத்துவத்தில் இருந்து மேலே சொன்ன செய்தியில் அப்படி என்ன புதிதாகச் சொல்லிவிட்டார்கள் எனப் புரியவில்லை. விபரம் தெரிந்த இயற்பியலாளர்களோ அல்லது மருத்துவர்களோ பின்னூட்டத்தில் விளக்குங்கள். நன்றி.

நீங்கள் உங்கள் அலுவலகத்தில் எரிச்சலூட்டுபவரா?

2005-09-12T21:12:00.000+03:00

நீங்கள் உங்கள் அலுவலகத்தில் உங்களுடன் பணி புரிவோரை எரிச்சலூட்டுபவரா? எல்லா அலுவலகத்திலும் இவ்வாறு சிலர் நிச்சயம் இருப்பர் என சொல்லித் தெரிய வேண்டியது இல்லை.. ஆனால் அவர்களில் ஒருவராக நீங்களும் இருக்கிறீர்களா? தொடர்ந்து படியுங்கள்..

1. பிறரை பேசத் தூண்டுவதற்காகவே provocative -ஆக உரையாடுகிறீர்கள்
2. அடிக்கடி பிறருக்கு கடினமான கலைச் சொற்களுடன் (buzzwords) வகுப்பு எடுக்கிறீர்கள்
3. பிறரை அவருக்கு நீங்கள் சூட்டிய பட்டப் பெயரை வைத்தே பாராட்டுகிறீர்கள்.
4. உங்கள் அறை, மேசையில் உங்கள் குழந்தைகளின் படங்கள் அல்லது அவர்கள் வரைந்த படங்களால் அலங்கரித்துள்ளீர்கள்
5. பிரபலமானோருடன் நீங்கள் எடுத்துக்கொண்ட நிழற்படங்களை உங்கள் அலுவலகத்தில் எல்லோரும் பார்க்கும்படி வைத்துள்ளீர்கள்
6. உங்கள் குரல்-மடலில் (Voicemail) நீண்ட நேரம் கவிதை போலப் படித்து செய்தி விடச் சொல்கிறீர்கள்.
7. பணி நிமித்தமான சந்திப்புகளில் (business meetings) நீங்கள் ஒவ்வொரு கேள்வி கேட்பதற்கு முன்னால் உங்களின் சாதனைகளைப் பட்டியலிட்டுப் பின் கேள்வி கேட்கிறீர்கள்
8. மிகுந்த மணம் கொண்ட மதிய உணவு உண்கிறீர்கள் (நல்ல மணம் தான்!)
9. நீங்கள் சமைத்துத் தோற்றுப்போன நால்களுக்கு அடுத்த நாள் உங்களுடன் பணி புரியும் சக ஊழியர்களுக்கு அவ்வுணவை சிறு விருந்தாக (treat) அளிக்கிறீர்கள்
10.நீங்கள் வருவதைக் கண்டாலேயே சக ஊழியர்கள் ஓடி மறைகிறார்கள். (பயமோ அல்லது மரியாதை(??)யோ)
11.நீங்கள் பேசினால் மற்றவர்கள் நீங்கள் பேசி முடிக்கும் முன்னரே உங்கள் கருத்துகளுக்கு ஒத்துப் போகிறார்கள்.
12.நீங்கள் என்ன செய்கிறீர்கள் என்பது உங்கள் அலுவலகத்தில் உள்ள அனைவருக்குமே தெரியும்படி மின்னஞ்சல் அனுப்புகிறீர்கள். (I'm just a call away / If anyone needs me I'll be in bathroom / etc)
13. எப்போதும் மெல்லும் பசை(chewing gum)மென்று கொண்டே இருக்கிறீர்கள்.
14. மூக்கைத் துளைக்கும் நறுமணம் பூசி வலம் வருகிறீர்கள்.
15.உங்கள் சொந்தப் பிரச்சனைகளால் உங்களின் சக ஊழியர்களும் மனதளவில் பாதிக்கப் பட்டுள்ளதாகவும் உங்களின் மேல் பரிதாபப் படுவதாகவும் நீங்கள் திண்ணமாக நம்புகிறீர்கள்.
16.இருவர் பேசிக் கொண்டிருக்கும் போது தேவையே இல்லாமல் மூக்கை நுழைத்து தலைப்பை உங்களை அறியாமலேயே மாற்றி விடுகிறீர்கள்
17.உங்களுக்கு மூட் (mood) சரியில்லை என்றால் அது அனைவருக்கும் தெரியவேண்டும் என நம்புகிறீர்கள்
18.உங்களின் சக ஊழியர் அல்லது உங்களுக்குக் கீழ் பணிபுரியும் ஊழியர்கள் வீட்டிற்குக் கிளம்ப ஆயத்தமாகும்போதே புதிய பணியொன்றை அளிக்கிறீர்கள்.
19.பிற ஊழியரிடம் கடனாகப் பெற்ற காகிதக் கத்திரி, ஸ்டேப்ளர் இன்ன பிறவற்றைத் திரும்பத் தர அடிக்கடி மறக்கிறீர்கள்
20. பிறாரிடம் உங்கள் உரையாடல் அடிக்கடி "You are so annoying" என்று முடிகிறது.

மேற்கண்டவற்றில் ஒன்று அல்லது இரண்டு உங்களுக்குப் பொருந்தினால், விரைவில் அவற்றிலிருந்து விடுபட்டு பிற ஊழியர் விரும்புபவராக நீங்கள் மாற வாய்ப்புள்ளது

3-5 பிற ஊழியர் உங்களைப் பற்றிச் சொல்வதை கவனியுங்கள். இல்லையெனின் நீங்கள் எரிச்சல்பேர்வழி என முத்திரை குத்தப் படலாம்.

6 அல்லது அதற்கு மேல் எனின் நீங்கள் ஏற்கனவே எரிச்சல்வாதி என முத்திரை குத்தப் பட்டு இருக்கலாம்.

என்றாலும், மிகவும் குழைவாகவோ அல்லது மிகவும் கடினமாகவோ நடந்தாலும் உங்களின் சக ஊழியர்கள் எரிச்சல் அடையக் கூடும்.

அவ்வப்போது எரிச்சல் படுத்துவதும் தவறில்லை என்று சில மனித வள மேம்பாட்டு வல்லுனர்கள் கூறுகிறார்கள்.

மூலம்: http://careerbuilder.com

உலகின் மிக அதிக அதிகார பலம்பொருந்திய 10 பெண்கள்

2005-08-01T15:34:00.000+03:00

இப்போது உலகின் மிக அதிக அதிகார பலம் பொருந்திய பெண்மணிகள் யார் யார் என ஃபோர்ப்ஸ் (Forbes) பத்திரிக்கை ஒரு பட்டியல் வெளியிட்டுள்ளது. சென்ற ஆண்டில் இந்த முதல் 10 பட்டியலில் இருந்த முன்னாள் இந்தோனேஷிய அதிபர் மேகவதி சுகர்னோபுத்ரி, ஹியூலட் பக்கார்டின் முன்னாள் முதன்மை அலுவலர் கேர்லி ஃபியோரினா ஆகியோர் காணாமல் போயுள்ளனர். இந்த ஆண்டின் முதல் பத்து பெண்களின் விபரம் வருமாறு:

1. கோண்டலீசா ரைஸ் - அமெரிக்க வெளியுறவு அமைச்சர். இரு ஆண்டுகளாகத் தொடர்ந்து முதல் இடத்தில் உள்ளார். 2008 அதிபர் தேர்தலுக்குக் கூட இவர் போட்டியிடலாம் என அரசியல் அவதானிகள் கருதுகிறார்கள்.

2. வூ யீ - சீன துணைப்பிரதமர், நலவாழ்வுத்துறை அமைச்சர். சமீபத்தில் சீனா தன் நாணயத்தை டாலருக்கு எதிராக இருந்த நிலையான (Peg) மதிப்பை சந்தைக்கேற்ப மாறும் (Float) மதிப்பாக மாற்றியதில் இவருக்குப் பெரும் பங்குண்டு.

3. யூலியா டிமோஷென்கோ - உக்ரைன் பிரதமர். உக்ரைனின் ஊழல் நிர்வாகத்தை எதிர்த்துக் குரல் கொடுத்து அதனைக் கவிழ்ப்பதில் பெரும் பங்கு ஆற்றியவர்.

4. குளோரியா அரோயோ - பிலிப்பைன்ஸ் அதிபர். தற்போது மிகுந்த அரசியல் நெருக்கடியில் இருக்கும் இவர் ஒரு பொருளாதாரப் பேராசிரியராம்.

5. மார்கரட் விட்மன் - இ-குடா (eBay) வின் முதன்மை அலுவலர். இ-குடாவை அமேசான், யாஹு இவற்றை விட முந்தியிருக்கச் செய்தவர். உலகின் பெரும் பணக்காரர்களில் ஒருவர்.

6. ஆன் முல்கஹி - முதன்மை அலுவலர், ஜெராக்ஸ்

7. சாலி கிராசெக் - முதன்மை நிதி அலுவலர், சிட்டிகுழுமம்

8. பிரெண்டா பார்ன்ஸ் - முதன்மை அலுவலர், சாரா லீ நிறுவனம்

9. ஓப்ரா வின்ஃப்ரே - முதன்மை அலுவலர், ஹார்போ

10. மெலிண்டா கேட்ஸ் - இணை நிறுவனர், கேட்ஸ் அறக்கட்டளை. (இவரது கணவர் வில்லியம் கேட்ஸ் என்பது வேறு விஷயம்)

மேலும் விபரங்களுக்கு

http://www.forbes.com/2005/07/27/powerful-women-world-cz_05powom_land.html

பி.கு: வலைப்பதிய செய்திகள் தேடும்போது நானும் பல செய்திகளைத் தெரிந்து கொள்கிறேன். அதற்காகத் தமிழ்மணத்திற்கு நன்றி.

BPO வுக்கு ஆபத்தா?

2005-07-31T12:42:00.000+03:00

BPO மூலம் பெரும் அன்னிய செலாவணியை ஈட்டி வரும் நாடுகளில் முதன்மையானது இந்தியா. இந்தத் தேன் நிலவு விரைவில் முடிவுக்கு வந்து விடுமா? இந்தக் கேள்வி எழ இப்போது என்ன தேவை என நீங்கள் நினைக்கலாம்.

குறைந்த பட்சம் ஆஸ்திரேலியாவிலுள்ள நிறுவனங்கள் தற்போது தனது சேவைகளை BPO மூலம் இந்தியாவுக்கு அனுப்புவதை மறுபரிசீலனை செய்ய முடிவு செய்துள்ளன.

டிலாய்ட் (Deloitte) நிறுவனம் நடத்திய ஓர் ஆய்வில் நால்வரில் ஒருவர் தமது சேவைகளை ஆஸ்திரேலியாவிற்குத் திரும்பக் கொண்டு வந்து விட்டதாகத் தெரிவித்துள்ளனர். என்ன காரணம் தெரியமா? உள்ளூரில் இருந்து இச்சேவைகளை வழங்குதல் வெற்றிகரமாகவும், சிக்கனமாகவும் இருப்பதாக அவர்கள் கருதுவது தான்.

50 விழுக்காட்டினர் அவர்கள் முன்னர் நினைத்தது போல BPO செலவு ஒன்றும் அவ்வளவாகக் குறையவில்லை என்றும் 70 விழுக்காட்டினர் தங்களுக்கு கசப்புணர்வே மிஞ்சியதாகவும் தெரிவித்துள்ளனர்.

இதனால் புதிதாக BPO மூலம் தம் சேவைகளை இந்தியாவுக்கு அனுப்ப எண்ணிக் கொண்டிருக்கும் நிறுவனங்கள் இதனை மிகுந்த எச்சரிக்கையுடன் அணுகப் போவதாகத் தெரிவித்துள்ளனர்.

இந்த ஆய்வில் பங்குபெற்றவர்களில் பாதிப்பேர் இம்மாதிரியான அணுகுமுறைகளில் மறைந்திருக்கும் செலவுகளே (Hidden Costs) அதிகம் என்று கருதுகின்றனர். 60 விழுக்காட்டினர் முதலில் தாம் எண்ணியதைவிட அதிக மேலாண்மை முயற்சிகள் தேவைப்பட்டதாகவும், 81 விழுக்காட்டினர் BPO வைப் பெறும் நிறுவனங்கள் தமது சேவைக்கான கட்டணமுறையில் வெளிப்படையாக இல்லாமல் அதிக செலவுகளுக்கு வழிவகுப்பதாகவும் கருதினர்.

மொத்தத்தில் டிலாய்ட் நிறுவனம் BPO முறையை செலவு குறைக்கும் முயற்சியாக அல்லாது ஒரு வணிக உத்தியாகப் பயன்படுத்துமாறு பரிந்துரைக்கிறார்கள்.

இந்த செய்திக்கான சுட்டி

http://in.tech.yahoo.com/050730/139/5zje4.html

வலைப் பதிய இன்னொரு காரணம் - ET

2005-07-31T09:04:00.000+03:00

உங்களிடம் நீங்கள் எதற்காக வலைப் பதிகிறீர்கள் என்று கேட்டால் என்ன பதில் சொல்வீர்கள்? சிலர் தமது ஆன்லைன் டயரி என்பர், சிலர் சமூகப் பிரச்சனைகளைச் சாடுகிறேன் என்பர். இதுபோல பல காரணங்கள் இருக்கலாம். இப்போது இன்னொரு காரணமும் சொல்லலாம். என்ன அது?

"நான் இந்தப் பூமி தவிர பிற கோள்களில் வசிப்போர் (ஏலியன்கள்) உடன் தொடர்பு கொள்ள விரும்புகிறேன்". சிரிக்காதீர்கள். அமெரிக்கா ஃபுளோரிடாவில் உள்ள மைண்ட்காமெட் (MindComet) என்கிற நிறுவனம் தங்கள் வாடிக்கையாளர்களின் வலைப் பதிவை பேரண்ட வெளிக்கு அனுப்ப முன்வந்துள்ளது. இந்த செய்தியை இந்நிறுவன முதன்மை அலுவலர் டெட் மர்ஃபி (Ted Murphy) தெரிவித்துள்ளார்.

தற்போதைக்கு இது இலவச சேவையாக இருக்கும். மனிதர்களைப் போன்ற அறிவுக்கூர்மை வாய்ந்த இன்னொரு இனம் எங்கோ இப்பேரண்ட வெளியில் இருக்கும், அந்த இனம் இந்த வலைப் பதிவுகளைக் கண்டிப்பாகப் படிக்கும் என தாம் உறுதியுடன் நம்புவதாக டெட் கூறியுள்ளார்.

செய்திக்கு சுட்டுக

http://tlc.discovery.com/news/afp/20050725/etblog.html

மைண்ட்காமெட்டின் ப்ளாக்-இன்-ஸ்பேஸ் சேவையைப் பற்றி மேலும் அறிய சுட்டுக

http://bloginspace.com/

என்ன நீங்களும் ஏலியன்களுடன் தொடர்பு கொள்ள தயாராகி விட்டீர்களா? என்ன ஏலியன்களுக்குத் தமிழ் தெரியுமா என்று தெரியவில்லை..

இது நல்லதுக்கா?

2005-07-27T21:24:00.000+03:00

சில நாட்களுக்கு முன் மைக்ரோசாஃப்ட் க்ளாரியா என்கிற உளவுமென்பொருள் தயாரிப்பு நிறுவனத்தை வாங்கியது. பலருக்கு அது அவ்வளவு நல்ல செய்தியாகத் தெரியவில்லை. இந்த சூடு ஆறும் முன்னேயே இன்னொரு திடுக் செய்தி வெளியாகி உள்ளது. தொடர்ந்து படியுங்கள்.

தத்தம் துறைகளில் பெரியண்ணன்களான மைக்ரோசாஃப்ட் மற்றும் சாப் (SAP) இருவரும் இணைந்து புதிய (?) ஒரு மென்பொருளைத் தயாரிக்கப் போகிறார்களாம். இதற்கு "மெண்டொசினோ" (Mendocino) என்று பெயரிட்டுள்ளார்கள். மைக்ரோசாஃப்டின் புகழ்பெற்ற மென்பொருட்களான ஆஃபிஸ், ஔட்லுக் இவற்றை, சாப்பின் வணிகத் திட்டமிடல் மென்பொருளோடு இணைத்து வெளியிட உள்ளார்கள். இதனால், பயனர்களுக்கு இரு மென்பொருள்களிலும் இருமுறை தகவல் உள்ளிடும் இரட்டிப்பு வேலை மிச்சமாவதால் பண மற்றும் நேர விரையம் குறைக்கப் படுமாம்.

இவ்விரு நிறுவனங்களும் இணைவதற்கான சாத்தியக் கூறுகளையும் ஆராய்ந்து இப்போதைக்கு அது சரிப்பட்டு வராது என்று இணைவதற்கு பதில் ஒருமித்து செயல்பட ஒத்துக்கொண்டுள்ளார்கள்.

இச்செய்தி பிற பெரிய நிறுவனங்களான ஐ பி எம், ஆரக்கிள் (தெய்வவாக்கு?) இவற்றின் வயிற்றில் நிச்சயம் புளியைக் கரைக்கும் என்று கார்ட்னரைச் சேர்ந்த ஒரு நிபுணர் கூறி இருக்கிறார்.

லோட்டஸ் நோட்ஸ், டிவலி இன்னும் விரல்விட்டு எண்ணிவிடக் கூடிய சில மென்பொருள்களை மட்டும் தன்னிடம் வைத்திருக்கும் ஐ பி எம்முக்கும் தன்னுடைய இ-பிசினஸ் சுயிட்டையும் க்ரிட் கம்ப்யூட்டிங்கையும் மட்டும் நம்பி இருக்கும் ஆரக்கிளுக்கும் இந்த செய்தி கவலையளிப்பதாகவே இருக்கும். இவை இரண்டும் துரிதமாக இதற்கு மாற்றாக ஏதேனும் செய்யாவிட்டால் இவற்றின் சந்தைப் பங்குக்குப் பங்கம் நிச்சயம் வரும்..

சாப், மைக்ரோசாஃப்ட் இருவரும் தத்தம் தயாரிப்புகளை பரஸ்பரம் இடத்திற்கேற்றாற்போல விற்பனை செய்து கொள்ளவும் ஒத்துக் கொண்டுள்ளனவாம்.

இந்தப் புதிய மெண்டொசினோ 2006ல் விற்பனைக்கு வரும் என இந்நிறுவனங்கள் கூறியுள்ளன. இது நல்லதுக்கா? .. காலம் தான் பதில் சொல்லும்..

குழந்தைகள் பாடல் - காட்டுப்பாக்கம் தாத்தா

2005-07-27T20:36:00.000+03:00

இப்போதெல்லாம் பல வலைப் பதிவுகளில் குழந்தைகள் கதை, பாடல்கள் வண்ண விளையாட்டு என்று களை கட்டி வ்ருவதால், நானும் என் பங்குக்கு சிறு வயதில் கற்ற ஆனால் இன்னும் மறக்காத பாடல் ஒன்றை சிறியவர், பெரியவர் மற்றும் (வளர்ந்த) குழந்தைகளுக்காகப் பதிகிறேன்.

காட்டுப் பாக்கம் தாத்தாவுக்கு
காடு போலத் தாடியாம்
மாடி மேலே நிற்கும் போதும்
தாடி மண்ணில் புரளுமாம்

ஆந்தை இரண்டு, கோழி, மைனா
அண்டங்காக்கை குருவிகள்
பாந்தமாகத் தாடிக்குள்ளே
பதுங்கிக் கொண்டிருந்தன

உச்சி மீது நின்ற தாத்தா
உடல் குலுங்கத் தும்மினார்
அச்சு அச்சு என்ற போது
அவை அனைத்தும் பறந்தன.

இப்பாடலை இயற்றியவர் கவிஞர் அழ.வள்ளியப்பா என்று நினைக்கிறேன். காப்புரிமைச் சிக்கல்கள் ஏதேனும் இருந்தால் அன்பர்கள் பின்னூட்டங்களில் சுட்டிக் காட்டுங்கள். பதிவைத் தூக்கிவிடுகிறேன்..... நன்றி.....

மூளைக்கு வேலை

2005-07-18T20:08:00.000+03:00

சரி.. வலைப்பூ ஒன்றை ஆரம்பித்தாகிவிட்டது... ஓரிரண்டு பதிவுகளையும் போட்டாகிவிட்டது.. அதில் சில நல்ல உள்ளங்களின் பார்வையும் விழுந்தாகி விட்டது.. (டேய் ஐஸ் வைக்காதே... என்னன்னு சொல்லு சீக்கிரம்..)

சரி சரி.. விஷயத்திற்கு வருகிறேன்... ஒரு சின்ன கணக்கு கல்லூரியில் படிக்கும் போது நண்பர்களிடம் கூறி விளையாடியது..

கணக்கு இது தான். மக்கள்தொகைக் கணக்கெடுப்பு அலுவலர் ஒருவர் ஒரு வீட்டின் அழைப்பு மணியை அழுத்திக் காத்திருக்கிறார். அந்த வீட்டில் இருக்கும் ஒரு பெண்மணி வெளியே வந்து என்ன என்று பார்க்கிறார். அலுவலர் தான் வந்த நோக்கத்தைக் கூறி வீட்டில் இருக்கும் நபர்களின் விபரங்களைக் கேட்கிறார். அந்தப் பெண்மணி தன்னுடைய வீட்டிலுள்ளோர் விபரங்களைக் கூறுகிறார். அவர் கூறியது இது தான். என் மூன்று மகள்களின் வயதின் பெருக்குத் தொகை 36 அவர்களின் வயதின் கூட்டுத் தொகை வேண்டுமானால் பக்கத்து வீட்டு கதவிலக்கத்தைப் பார்த்துக் கொள்ளுங்கள் என்று கூறிவிட்டு வீட்டினுள் சென்றுவிட்டார். அந்த அலுவலர் பக்கத்து வீட்டுக் கதவிலக்கத்தைப் பார்த்துவிட்டு மீண்டும் அழைப்பு மணியை அழுத்த நினைக்கும் போது உள்ளிருந்து அந்தப் பெண்மணி தன் மகள்களிடம் பேசுவது அவ்வலுவலரின் காதில் விழுகிறது. கணக்கெடுப்பு அலுவலரோ அழைப்பு மணியை அழுத்தாமல் புன்னகைத்துக் கொண்டே தன்னுடைய ஏட்டில் வயது விபரங்களை எழுதியபடி சென்று விடுகிறார். அந்தப் பெண்மணி அப்படி என்ன கூறினார்? கேள்வி அதுவன்று.. சற்றுப் பொறுங்கள்.. அவர் கூறியது இதுதான்... "அக்கா மாடியில் தூங்குகிறாள். சத்தம் போடாமல் விளையாடுங்கள்"....

சரி இப்போது கேள்விக்கு வருகிறேன்.. அவரது மகள்களின் வயது என்ன? அப்பாடா ஒருவழியாக கணக்கைச் சொல்லி விட்டேன்.. உங்கள் விடைகளைப் பின்னூட்டமிடுங்கள்.. சரியான விடை சொன்னவருக்கு ஒரு சபாஷ் போடுகிறேன்.. அவரது பதிவில் ஒரு + குத்து விடுகிறேன்..

தாயின் தியாகமா? விளம்பர உத்தியா?

2005-07-10T08:53:00.000+03:00

வர வர எப்படித்தான் விளம்பரங்கள் செய்வது என்று ஒரு வரை முறை இல்லாமல் போய் விட்டது. நான் இங்கே குறிப்பிட விரும்புவது விளம்பர உள்ளடக்கங்களை அன்று. அவை செய்யப்படும் ஊடகங்கள் பற்றி.

அமெரிக்காவில் ஒரு தாய் தனது மகனின் படிப்புச் செலவுக்காக தன்னுடைய நெற்றிப் பரப்பை பத்தாயிரம் டாலருக்கு ஒரு சூதாட்ட விடுதி விளம்பரம் செய்யப் பயன்படுத்த 'விற்றுள்ளார்'. ஆம் ஆச்சரியப் படாதீர்கள்.

கரோலின் ஸ்மித் என்கிற 30 வயது தாய் தன்னுடைய மகனின் படிப்புச் செலவிற்காக என்ன செய்வது என்று சிந்தித்த போது அவருக்கு இந்தத் திட்டம் உதித்தது. இதனைப் பற்றி அவர் குறிப்பிடுகையில் இது ஒரு முட்டாள் தனமாகப் பலருக்குத் தோன்றலாம். ஆனால் எனக்கு இந்தப் பத்தாயிரம் டாலர் ஒரு மில்லியன் டாலருக்கு சமம். வாழ்வதோ ஒரு முறை. இந்த வாழ்வை என் மகனுடைய சிறப்பான எதிர்காலத்திற்காகக் கழிக்க விரும்புகிறேன். என் மகனின் படிப்புச் செலவிற்கு இந்தத் தொகையைப் பயன் படுத்திக் கொள்வேன்.

என்னுடைய இந்த முடிவு சாதாரணமாக எடுத்ததன்று. பல நாள் என் தோழருடன் கலந்தாலோசித்து எடுத்தது இம்முடிவு.

கரோலினின் நெற்றிப் பரப்பை "வாங்கி"யுள்ள கோல்டன் பேலஸ் என்கிற சூதாட்ட நிறுவனம் இது போன்ற வித்தியாசமான விளம்பர உத்திகளுக்கு பெயர் போனதாம். இனி வரும் காலங்களில் எல்லோரையும் போல விளம்பரம் செய்வது பல பேரைச் சென்றடையாது எனவே நாங்கள் இவ்வாறு ஏதாவது வித்தியாசமாக (?) செய்கிறோம் என்று அந்நிறுவனம் கூறியுள்ளது.

கரோலின் கேட்ட பத்தாயிரத்துடன் மேலும் ஒரு ஐயாயிரம் டாலர்களை அளிக்க முன்வந்துள்ளதாம் அந்நிறுவனம்.

மேலும் விபரங்கள் அறிய சுட்டுக

http://tlc.discovery.com/news/afp/20050704/mother.html

கரோலினின் தாயன்பை நினைத்துப் பூரிப்பதா அல்லது கோல்டன் பேலஸின் விளம்பரத் தந்திரத்தை எண்ணி வியப்பதா? ஒன்றும் தோன்றவில்லை எனக்கு.. உங்களுக்கு என்ன தோன்றுகிறது எனப் பின்னூட்டுங்கள் அன்பர்களே.

மூன்றாவது பதிவு

2005-07-04T16:58:00.000+03:00

ஹி.. ஹி.. இது சும்மா தமிழ்மணத்துக்குள்ளாற வாரதுக்கு... அதான் நம்ம தமிழ்மணத்தார் மூணு பதிவு எழுதுனாத் தான் உள்ள வர முடியும் இல்லன்னா அப்படி ஓரமா நின்னு வேடிக்கை பாருன்னு சொல்லிப்புட்டாகள்ள...

இனிமேல் ஒழுங்கா நல்ல பிள்ளையா பல கோணங்களில் பதிவுகள் போடுவேன்னு இப்போ சொல்லிக்கிறேன்...

நன்றி...

முதல் பதிவு

2005-07-03T21:39:00.000+03:00

இது என்னுடைய முதல் பதிவு. தமிழ்மணத்தில் முதலில் அனானிமசாகவும் பின்னர் ஒரு ப்ளாக்கர் கடவுச்சொல்லுடனும் இதுவரை ஓர் ஓரமாக நின்று வேடிக்கை பார்த்துக்கொண்டு இருந்தவன் இன்று இதோ வலைப்பதிவுகளில் குதித்தே விட்டேன்.

வரவேற்பா அல்லது தர்ம அடிகளா? நீங்கள் முடிவு செய்யுங்கள் அன்பர்களே!